Хуманитарна кампања за Дневниот центар за деца со аутизам

Денеска почнува тримесечната кампања „За хуманоста да стане навика“, која се состои од собирање средства наменети за уредување на Дневниот центар за деца со аутизам во Скопје на „Натусана Македонија“, со што компанијата ќе го одбележи својот 10-годишен јубилеј.

– „Натусана Македонија“ преку својата работа веќе десет години континуирано се грижи и едуцира за создавање здрави навики кај нашите потрошувачи. Како надградба на нашата десетгодишна мисија ја создадовме и кампањата „За хуманоста да стане навика“ која има за цел да обедини и поттикне на хуманост за сите заедно да помогнеме за Дневниот центар за деца со аутизам да биде подобро и попријатно место. Се надеваме дека ќе бидеме успешни во нашата цел и хуманоста како и споделувањето радост на другите ќе ни стане секојдневна рутина и навика – изјави Александар Донев, генерален менаџер на „Натусана“.

„Натусана“ за опремување на дневниот центар ќе издвои свои средства, а исто така ќе се издвојува и процент од продажбата на витамините „мултивитамол“ и детската линија за орална хигиена „лакалут“. Производите од чија продажба се издвојуваат средства за донирање во Центарот се достапни во сите аптеки.

– Иницијативата за подигнување на свеста за потребите на нашиот центар е добредојдена во секој можен аспект. Секој нов ден во дневниот центар е нов предизвик затоа што децата со нарушен аутистичен спектар имаат посебна дарба да го доживеат светот, тоа ги прави толку нежни а од друга страна и посебни. Подеднакво желни за комуникација бараат поинакво внимание и пристап. Затоа толку ни е неопходна специјална опрема и реквизити како би можеле на овие деца да им обезбедиме што понормално живеење –  додаде Елена Степаноска, координатор во Дневниот центар за аутизам во Скопје.

Хуманитарната акција ќе се финализира на 20 ноември по повод Интернационалниот ден на детето што е симболично поврзано и со производите од чија продажба ќе се издвојуваат средства и со корисникот на донацијата.

Во Дневниот центар за аутизам престојуваат 10 деца во текот на целиот денот, 5 деца се под опсервација, а за нив се грижат логопед, психолог, дефектолог и негувател.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.