Илјадници Палестинци живеат во училишта (Фото)

Илјадници Палестинци во Појасот Газа и понатаму живеат во училиштата, во кои се засолнија за време на 50-те денови судири меѓу Израел и Хамас, прекинати пред неполни две недели.

Во израелските воздушни напади врз таа палестинска територија уништени беа околу 17.000 куќи. Обновата се уште не е почната бидејќи на сила се уште е блокада воведена пред седум години од Израел и Египет со што е ограничен увозот на цемент и друг градежен материјал.

Израелски неименуван официјален претставник вели дека разузнавачките информации укажуваат дека Хамас веќе почнал да обновува тунели уништени за време на израелската воена операција и го обновува својот арсенал.

Појасот Газа со 1,8 милиони жители на 360 км/квадратни се уште трпи последици од претходните судири со Израел во 2008 и 2012 година. Речиси 100.000 жители од Газа немаат кров над глава и во училишта на ОН се уште има илјадници луѓе само една недела пред почетокот на школската година.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.