Трајковски: Законските измени за ДДВ-обврзниците се по барање на малите фирми

Ноторна лага се информациите што деновиве ги пласираат некои медиуми дека законските измени кои предвидуваат намалување на прагот од два на еден милион евра за ДДВ обврзниците ќе бидат смртна казна за малите бизниси – рече денеска директорот на Управата за јавни приходи, Горан Трајковски.

Според него, бесмислени се и тезите дека оваа мерка се воведува за да се полни буџетот.

– Ова е барање на малите бизниси. Доколку тие не се ДДВ-обврзници, не можат да бидат конкурентни и атрактивни на пазарот, ниту препознатливи за големите компании – напомена Трајковски на денешната прес-конференција.

Тој тврди дека малите ДДВ-обврзници создаваат негативен ДДВ ефект на буџетската сметка.

Во Македонија моментно се регистрирани 34.000 ДДВ обврзници. Во согласност со тековните анализи по повод предложените законски измени,  10.305 субјекти исполнуваат услови да станат ДДВ-обврзници со планираниот праг од еден милион евра годишен промет. Сепак, како што истакна директорот Трајковски, точната бројка ќе се знае во јануари идната година до кога ќе се процени и буџетскиот ефект од измените.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.