Фондот за здравствено осигурување на Македонија (ФЗОМ) ја прошири листата на нутритивните продукти за лица со ретки болести. Станува збор за посебни видови на брашно, млеко, масло за јадење кои претставуваат основна исхрана и лек за овие лица.
Директорката на ФОЗМ Маја Парнарџиева Змејкова на денешната прес-конференција информираше дека од 1 август воведуваат две новини: правото на беспротеинско брашно и беспротеинско млеко ќе го добијат сите лица со заболување на метаболизмот на аминокиселини и метаболизмот на масни киселини и право на новововедени хипоалергено млеко во прав и масло од средноланчани триглицериди за лицата со Alagille Syndrome.
За првата новина листата на товар на Фондот е проширена во делот на право на безглутенско брашно и млеко, за лица со заболувања на аминокиселини и масни киселини и тоа група на заболувања на метаболизам на разгранети аминокиселини, на масните киселини, на аминокиселинскиот транспорт, на аминокиселините со сулфур, на заболувања на метаболитичкиот циклус на уреата, на метаболизмот на лизин и хидроксилизин, на глицинскиот метаболизам и на други означени заболувања на метаболизмот на аминокиселините.
– Новините значат голема заштеда на овие лица и нивните семејства затоа што се изложени на трошок од 4.000 до 35.000 денари за храна, односно 4.000 денари за бесглутенското брашно, 20.000 денари месечно за беспротеинското брашно и млеко, околу 10.000 денари за хипоалергена формула за млеко со 55-80% на средноланчани триглицериди и 3.000 денари за СЛТ-маслото – рече Парнарџиева Змејкова.
За лицата со ретки болести кои користат исхрана како лек во своето секојдневие, ФЗОМ започна со воведување определени продукти уште во 2007 година, кога првпат на позитивната листа на лекови на рецепт се воведе бесглутенското брашно и млеко за лицата со алергија на глутен.
Во изминатиот период од страна ФЗОМ се евидентирани 247 лица со дијганостицирана алергија на глутен кои се хронични корисници на продукти без глутен (брашно и млеко). Во февруари 2014 година со измената на правилникот по барање на осигурани лица со ретки болести, како што е Фенил кетонуријата и Rett Syndrome, ФЗОМ воведе првпат нова група помагала и тоа безглутенско брашно за лица заболени од Ret Syndrome и беспротеинско брашно и млеко за лица заболени со Фенил кетонурија, заболување на тирозинскиот метаболизам – тирозимении, хистидински и триптофански метаболизам.
– Сите досегашни измени кои ги воведе Фондот се однесуваат на околу 300 осигуреници со вакви заболувања – рече директорката на ФЗОМ.
Парнарџиева Змејкова образложи дека лицата кои имаат потреба од ваква исхрана за да си ги повратат средствата треба да приложат фискална сметка за трошокот којшто го поднеле тие во прв момент и, согласно Законот, Фондот во рок од 30 дена треба да изготви решение и да ги исплати средствата. Според Правилникот еден дел од трошокот е партиципација, која што останува на трошок на пациентот, а другиот дел го исплатува ФЗОМ.
– Дел од овие продукти не се регистрирани во Македонија, ќе рефундираме врз основа на трошокот што ќе го прикаже осигуреникот и затоа не може точно да се прецизира оптоварувањето што ќе го има Фондот, но проценуваме дека би било потребно околу пет милиони денари на годишно ниво – рече директорката на ФЗОМ на денешната прес-конференција.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
