Српскиот музичар Жељко Јоксимовиќ посебено се гордее со концертот што го одржа на 21 јуни во арената „Филп Втори“ во Скопје, поради тоа што го соборил личниот, но и рекордот на своите колеги. Јоксимовиќ за српски „Блиц“ открива дека сѐ уште ги средува впечатоците и емоциите од спектакуларниот концерт.
– Kонцертот во Скопје е круна на мојата досегашна кариера и ќе остане запаметен во историјата на Македонија како најголем настан на сите времиња. Македонците и јас дефинитивно имаме ист вкус и заемно се почитуваме и се сакаме. Признавам дека сѐ уште во сеќавање ми е грандиозната слика од повеќе од 60.000 насмеани и среќни луѓе поради мојата музика – го опишува Жељко својот впечаток од настанот.
Тој признава дека на секој настап има трема, но Македонците го разоружиле уште од самиот старт и со голем аплауз ги поздравиле неговите гости.
– Секогаш пред настап се прашувам дали со публиката ќе ја најдеме вистинската нишка и дали средбата на сите ќе им остане во добро сеќавање. Освен моите величествени гости, ме израдува и тоа што дојдоа голем број мои пријатели, за што сум им благодарен и поради што сум среќен човек. Некои од нив ме изненадија така што забавата што се случи по концертот беше посебна приказна од оваа македонска сага – посочил пејачот.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
