ДУИ ја повика опозицијата да се врати во парламентот

Македонската влада има чист легитимитет од мнозинство граѓани, вклучувајќи го и двојното етничко мнозинство од неодамнешните предвремени парламентарни избори на кои граѓаните ги одобрија програмите на политичките партии, а кои се трансформирани во владината програма и тие очекуваат таа да биде имплементирана до крај.

Ова е еден од заклучоците донесен на денешната седница на Претседателството на Генералниот совет на ДУИ, во врска со барањата од страна на македонските опозициски партии за предвремени парламентарни избори и реформирање на владата по нивна волја.

Според ДУИ, земјата е во стабилна политичка ситуација, институциите функционираат во согласност со Уставот и законите. Тие со повик до опозицијата да се врати во институциите и низ заедничка дебата да се решат предизвиците со кои се соочува земјата. Воедно, од партијата гарантираат одржување фер и демократски избори според меѓународните стандарди.

– ДУИ во својата 10-годишна активност покажа дека секогаш кога таа организира избори во секое ниво тие се мирни, фер и демократски. И овој пат ДУИ превзема највисока морална и политичка одговорност да гарантира одржување на избори, во кои ќе се применат највисоките стандарди препорачани од страна на ОБСЕ/ОДИХР, се наведува во соопштението.

Партијата, се додава, останува посветена на стратешките цели на државата за спроведување на евро-атлантската интеграција и подобрување на животниот стандард на граѓаните.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.