Коби Брајант и Дирк Новицки приредија шутерско шоу во Далас, а поуспешен беше бекот на Лос Анџелес лејкерс со 38 поени, наспротив 30 на германскиот ас. Лејкерси славеа со 103-99, а натпреварот имаше посебен шмек и поради кавгата меѓу Брајант и сопственикот на Далас, Марк Кјубан.
Контроверзниот Кјубан изјави дека е време „езерџиите“ да се ослободат од Брајант, а овој возврати со рафална стрелба и со импресивна партија, во живо на теренот на Далас. Бекот беше енигма за одбраната на Маверикс и им го изрешета кошот, покажувајќи дека сеуште е во врвот на НБА. Со 38 поени, 12 скока и 7 асистенции, Брајант беше прва звезда на теренот, а одличен беше и Новицки. Германецот се враќа во ритма, откако пропушти 27 натпревари на почетокот од сезоната. Постигна 30 поени со 13 скока, сепак недоволно за триумф на Далас.
Во препознатлив елемент беше и Ол-стар тандемот на Мајами, Леброн Џејмс и Двејн Вејд, а шампионот ја продолжи страшната серија од 11 натпревари без пораз. Џејмс му даде 28 поени на поранешниот тим Кливленд во победата од 109-105. До почетокот на третиот период немаше неизвесност, во еден момент Мајами водеше и со 22 разлика, но гостите возвратија со драматичен пресврт. На 5 минути до крајот Кливленд поведе со 8 поени разлика и беше на прагот на втората победа во 9. меч против Мајами, откако Џејмс ги напушти. Сепак кралот си е крал и токму Леброн пак им го загорчи животот. Тој го предводеше завршниот атак за нова победа, а му помогна и Вејд со 11 поени во последните 5 минути.
„Ние сме стара гарда кошаркари и сме биле во секакви ситуации. Никогаш нема паника, без разлика на резултатот. Играме до крај на победа – рече Џејмс.
Ефектот на шампионите е прво место во источната дивизија, и најдолга серија победи во моментов во НБА.
Сосема спротивен беше учинокот на екипите на Чикаго и Бруклин кои постигнаа прескромни 72 поени во поразите од Оклахома, односно Мемфис. Биковите од Чикаго забележаа неславен рекорд од 29,1 процент удар од поле против Оклахома, што е најлош процент сезонава.
Резултати: Далас – Л.А. лејкерс 99-103, Мајами – Кливленд 109-105, Оклахома – Чикаго 102-72, Бруклин – Мемфис 72-76, Феникс – Сан Антонио 87-97, Минесота – Голден стејт 99-100, Њу Орлеанс – Сакраменто 110-95, Њујорк – Филаделфија 99- 93, Портланд – Бостон 92-86.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
