Сакате ли да видите што прави турскиот аскер? Влегувајте внатре! Влегувајте! Сакате да видите каде се вашите браќа и сестри? Сакате да ги видите страдањата на македонскиот народ?
Актер, кој глуми војник на турската војска одеднаш те зема за рака и практично те втурнува во новата поставка на Музејот на македонската борба, која денеска беше промовирана. Така беа втурнати и премиерот Никола Груевски, министерката за култура Елизабета Канческа-Милевска, вицеприемиерот Владимир Пешевски, министерката за внатрешни работи Гордана Јанкуловска, потоа Јордан Плевнеш и други личности, кои денеска присустуваа на поставката, која за посетителите на Музејот ќе биде отворена од вторник, 3 јуни.
Актери од Македонскиот народен театар, од ЕСРА се дел од автентичната музејска поставка во која се прикажани страдањата на македонскиот народ низ вековите. Восочни фигури, но и актери се дел од преставата, која ја режираше Дејан Пројковски, а Валентин Светозарев беше задолжен за сценографијата. Целиот перформанс трае десетина минути, просторот дозволува да се влегува во групи, оптимално е седум лица да ја погледат поставката. Актерите се меѓу посетителите, за да може да ја доловат вистинската атмосфера и тоа што се случувало пред многу години.
Темници, глави на кол, трупови, тепања, затвори, мајки што си ги барраат своите загубени деца, бесилки, џелати… Ова не е глетка за тие со слабо срце. Секако, оваа музејска поставка не е ниту за малолетни деца.
– Каде е Коста, сте го виделе ли мојот Коста? – прашува мајката што оди по вас и го бара загубениот син.
Посетителите се сведоци на ѕверското малтретирање на Страшо Пинџур, на Мирче Ацев, на вработените во затворите, а во глава постојано им одѕвонува плачот на мајките што ги бараат загубените синови.
– Страшно. Уште сум потресена – коментираше актерката Јелена Жугиќ по завршување на поставката.
Фото: Игор Ангеловски
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
