Храна, лекови, облека, вода, средства за лична хигиена, сортирани во посебни кутии испраќаат македонските граѓани до своите соседи.
Министерот за транспорт и врски, Миле Јанакиески, е координатор и денеска излезе на терен за да ги следи акцијата и испраќањето на донацијата.
Тој се заблагодари до македонските граѓани и Црвениот крст за хуманоста, како и на сите други кои дадоа придонес за оваа хуманитарна акција.
Околу 240 тони на стока се собрани преку донации, а Јанакиески апелираше граѓаните, пред сѐ, да доставуваат конзервирана храна, вода и хигиенски средства.
– И во наредните денови ќе продолжиме со испорака на стока бидејќи навистина се во лоша состојба поплавените општини во Србија и во Босна и Херцеговина. Им треба помош која ние како Република Македонија, како граѓани на Македонија, од денеска ја испорачуваме. Организиран е превозот, информирани се сите служби, Царинската управа и МВР. Очекувам денес, кон крајот на денот, оваа стока да пристигне во Србија – рече Јанакиески.
Утре Македонија ќе испрати помош и во Босна и Херцеговина.
Вкупно досега е собрана стока со тежина од 240 тони, а Јанакиески очекува уште повеќе да се зголеми следниве денови.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
