Во две скопски градинки и две основни училишта на територијата на Скопје има шарлах, објави „Вест“. Како што пишува весникот, Центарот за јавно здравје направил стотина превентивни прегледи, по пријава на осум заболени од шарлах.
Д-р Лилјана Лазаревска од одделението за епидемиологија во Центарот за јавно здравје, објаснува дека засега станува збор за изолирани случаи на заболени од скарлатина, бидејќи лабораториски присуство на бактеријата е потврдена само кај осум заболени.
– Немаме пријава од училиштата и од градинките дека бројот на деца е намален поради оваа зараза. На сите што биле во контакт со заболените земени им се превентивни брисови, но тоа не значи дека понатаму не може да се заразат ако дојдат во контакт со заболено лице. Не мора да значи дека изворот на бактеријата е во училиштето или во градинката – вели д-р Лазаревска.
По заразата, инкубацијата трае од еден до три дена, а болеста почнува нагло, со висока температура, болки во грлото и исфрлување по кожата и слузта. Ако не се лекува навреме, болеста може да предизвика воспаление на зглобовите и на срцевиот мускул, познато како ревматска грозница.
Превентивно, за да не дојде до зараза, потребно е зголемена лична хигиена и хигиена на просторот во кој се престојува, дезинфекција на просторот, а ако во семејството има заболено дете со шарлах, и родителите и останатите членови на семејството да направат брисови за да се утврди дали и тие се носители на бактеријата.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
