Лидерот на ВМРО-ДПМНЕ Груевски имаше средби со граѓаните на Делчево

Во Делчево денеска престојуваше претседателот на ВМРО-ДПМНЕ и премиер Никола Груевски, кој заедно со носителот на кандидатската листа за пратеници на ВМРО-ДПМНЕ и Коалицијата „За подобра Македонија“ во Третата изборна единица, Никола Тодоров, и со кандидатката за пратеник од Делчево Милка Христова, имаше повеќе средби со граѓани.

На делчевци тие им ги претставија проектите предвидени во изборната програма „Проверено“ и им одговараа на конкретни прашања.

Груевски и градоначалникот на Делчево Дарко Шехтански попладнево ја посетија старата градска црква „Успение на Пресвета Богородица“ и присуствуваа на богослужбата.

Во кафе-бар во градот претставниците на ВМРО-ДПМНЕ и коалицијата имаа кратко дружење и со младите на Делчево.

Коалицијата „За подобра Македонија“ предводена од ВМРО-ДПМНЕ вечерва имаше закажано митинзи во Македонска Каменица и во Делчево, но од почит кон верските чувства на граѓаните кои ги празнуваат велигденските празници, партијата одлучи денеска и утре (Македонски Брод и Кичево) митинзите да ги замени со други активности.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.