Вечерва се играат последните два натпревара од четврт-финалето на Лигата на шампиони. Манчестер јунајтед со нерешен резултат оди на „Алијанц арена“, а со истиот резултат 1-1, Атлетико Мадрид на „Винсенте Калдерон“ ја пречекува Барселона. Баерн Минхен влегува како фаворит во реваншот против Јунајтед, но Руни се надева на изненадување.
– Јас верувам, а и моите соиграчи веруваат дека можеме да обезбедиме пласман во полуфиналната рунда од Лигата на шампиони. Доволно сме квалитетни, имаме доволно добри фудбалери. Ќе ни биде многу тешко, но мора да одиграме без грешка, совршено – изјави Руни.
Швајнштајгер нема да може да настапи поради црвениот картон заработен на „Олд трафорд“.
Херардо Мартинез ќе се обиде да најде начин како да ги надигра избраниците на Диего Симеоне, кои на првиот меч можеби беа и подобриот ривал на „Камп Ноу“. Мартинез нема да може да смета на Џерард Пике, а под знак прашалник е и Карлес Пујол.
– Првиот натпревар беше доста напорен, физички и психички. Имаше доста притисоци на двете страни. Верувам дека така ќе биде и сега. Ние ќе се бориме од првата до последната минута. Се надеваме дека ќе одиграме добро и ќе успееме да се пласираме во полуфиналето – рече Иниеста.
Во Атлетико се очекува Диего Коста да биде во почетниот состав, додека Арда Туран нема да му биде на располагање на Симеоне.
Реал Мадрид и Челси се првите полуфиналисти во Лигата на шампионите откако вчера со многу мака успеаја да ги елиминираат Борусија Дортмунд и Пари Сен-Жермен.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
