Вечерва во 20 часот во МКЦ, Факултетот за драмски уметности од Скопје ја претставува дипломската претстава „Илузија – Zucco“. ИЛУЗИЈА-ZUCCO“ е драмска композиција сочинета од текстовите „Роберто Зуко“ од Бернар-Мари Колтес и „Малечката“ од Сема Али.
Текстот и претставата се обидуваат да дофатат една Фуковска димензија (Мишел Фуко – „Надзор и казна“) според која ЦЕЛИОТ СВЕТ Е МОДЕРЕН ЗАТВОР. Од тој затвор, во кој секој е под постојан надзор и контрола, едноставно не може да се избега зашто зад секои ѕидови има други, поголеми и повисоки, зад секои решетки има други, погусти и посигурни.
Рамка на претставата е текстот „Малечката“. Малечката, која живее во свет на извитоперени вредности во семејството и надвор од него, доаѓа во допир со приказната за серискиот убиец Роберто Зуко и откако неуспешно се обидува да ја живее неговата приказна, да го следи неговиот пат, да ја води неговата „војна“, пишува за него (Колтес), вградувајќи се себеси и сопствените искуства во приказната за Зуко. Тоа оваа Малечка ја прави современ Зуко, кој го испитува светот по дваесет години систематско самоуништување, светот кој го доживува зенитот во живеењето на идеологијата на проѕирните, невидливите, бесчувствените, отуѓените, первертираните, извршителите, заслепените, роботизираните, бројките.
Роберто Зуко, серискиот убиец или човекот кој се ослободува од авторитетите на семејството и општеството за да го дофати Сонцето, Роберто Зуко различниот, непроѕирниот, непредвиливиот, Роберто Зуко другиот, во еден ваков свет претставува уште поголема закана, трн во око, некој кој безусловно треба да се промени, да се припитоми, да се прилагоди, да се изолира, да се елиминира.
Играат:
Владимир Петровиќ, Јанка Лефкова, Вирџинија Ристеска, Ивана Павлаковиќ, Нина Максимова, Марко Трајковиќ, Ава Хусеини, Сандра Грибовска, Благојчо Стојанов, Столе Мицов, Ангела Наумоска, Симон Манасковски, Марко Богдановски (класа на вон. проф. м-р Зоја Бузалковска и дем. Александар Степанулески).
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
