Њујорк никс во „Медисон сквер гарден“ ја дочека екипата на Бруклин нетс и успеа да слави во градското дерби со резултат 110-81. Најзаслужни за добрата игра на Никс беа Џеј Ар Смит со 24 поени и Кармело Ентони со 23 постигнати поени и 10 скока. Кај гостите, Џо Џонсон постигна 16 поени, додека, пак, Дерон Вилијамс уфрли 12.
Њујорк сега е на осмата позиција на истокот благодарение на поразот на Атланта, кој им е директен ривал во борбата за последното место кое води натаму.
Екипата на Атланта хоукс го забележи седмиот пораз на последните осум натпревари откако на домашен терен загуби од Чикаго со 92:105. Со овој пораз Атланта се најде надвор од плејоф-зоната откако на осмата позиција во источната конференција се проби Њујорк. Перо Антиќ на теренот мина нешто повеќе од 10 минути, а зад своето име запиша по еден скок и асистенција.
Сан Антонио до 19. победа во низа дојде на домашен терен каде што беше подобар од Голден стејт вориорс со 111:90. Ова беше уште еден добар натпревар за избраниците на Грег Поповиќ. Тони Паркер го заврши натпреварот со 18 поени и осум асистенции, 15 уфрли Тим Данкан, а со по 13 поени натпреварот го завршија Ману Џинобили и Петрик Милс.
Резултати: Индијана – Детроит 101-94, Орландо – Кливленд 98-119, Филаделфија – Шарлот 93-123, Торонто – Хјустон 107-103, Вашингтон – Бостон 118-92, Мајами – Милвоки 96-77, Минесота – Мемфис 102-88, Денвер – Њу Орлеанс 137-107, Феникс – ЛА Клиперс 108-112, Сакраменто – ЛА Лејкерс 107-102
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
