Јанкулоска: Повеќе од 7.000 полициски службеници ќе поминат низ систем на обука за изборниот процес (ВИДЕО)

Министерката за внатрешни работи, Гордана Јанкулоска, денеска присуствуваше на работна средба со раководниот кадар на МВР што се одржа во Центарот за обука во Идризово, а со цел за спречување на незаконското и непрофесионалното постапување на припадниците на МВР за време на изборниот процес.

За таа цел, изработен е специјален прирачник, во кој се содржани најважните делови од законската регулатива и препораки за полицајците, како да се однесуваат во одредени ситуации кога ќе треба да донесе одлука на самото место.

– Евидентно е дека во последниве неколку изборни циклуси полициските службеници во голема мера го имаат унапредено своети однесување, што значи се помалку се соочуваме со конфликтни ситуации, инциденти и проблеми кадешто се инволвирани полициски службеници, но сепак, и оваа година одлучивме повеќе од 7.000 полициски службеници да поминат низ децентрализиран систем на обука – изјави Јанкулоска.

Според неа, посебно важно за овие два паралелни изборни процеса – претседателските и предвремените парламентарни избори, е тоа што првпат ќе се одржуваат во ваква форма, но и според новиот Изборен законик, иако голем дел од полициските службеници постапувале и биле обучувани, сепак потребно е да се обнови знаењето и да се запознаат со новата законска регулатива.

Раководителот на Секторот за внатрешна контрола и професионални стандарди, Анета Станчевска, истакна дека вработените во МВР не смеат да ја доведат во прашање професионалноста и законитоста при вршењето на работите.

– Полициските службеници надвор од работното време да не се ставаат во функција на политичките партии во вршење на предизборни или изборни нерегуларности, да не го нарушуваат јавниот ред и мир и угледот на МВР, да се воздржуваат од какви било провокации на активисти на политичките партии. Доколку учествуваат во вакви настани, против нив ќе бидат превземени најригорозни дисциплински мерки – истакна Станчевска.

Дел од изјавата на министерката Јанкулоска може да погледнете на видеото на ТВ Република.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.