Груевски: Бранко е поголем Грк од Самарас

Тој на промоцијата на програмата на кандидатот за градоначалник на ВМРО-ДПМНЕ и коалицијата  „За подобра Македонија“ во општина Центар Владимир Тодоровиќ посочи дека за прв пат во овие 20 години во кои земјата се стреми и ги реализира европските и евроатлантските интеграции попречувањето на патот нема да дојде од некој од надвор од некој друг туку ќе дојде одвнатре од некој домашен.

– Со пробивот во евроинтеграциите, Бранко не може да се помири. Затоа прави се за нас да не обвини. Бранко стана поголем Грк и од Самарас. Ако тој остане на бојкотот и го наруши имиџот што го доби Македонија, и го изгубиме позитивниот извештај и препораката, најпознатиот Грк нема да биде Ггркот Зорба, туку најпознатиот Грк ќе биде Бранко. Затоа што со неговото делување тој одработува за Грција, и со неговото делување Грција нема потреба да ни го попречува патот-нагласи Груевски.

Претседателот на Владата уште еднаш го повика лидерот на опозициската СДСМ да престане да гледа само на, како што рече, својата лична политичка кариера и заради тоа да не и прави штета на Република Македонија. Груевски повторно го повика Црвенковски на избори каде, според него, ќе можат да видат кому му веруваат граѓаните.

– Единствената мака што ја имаат и единствената работа што ги мачи и идеја да бојкотираат е дека тие немаат што да понудат. Затоа тие барат излез и начини како да ги избегнат изборите, рече Груевски.

На обвинувањата од опозициската СДСМ дека има диктатура и дискриминација претседателот на Владата рече дека зголемувањето на пензиите, стипендиите, субвенциите, социјалната помош не е диктатура и давањето финансиски средства за правење претстави, субвенциите за семејствата на членови од СДСМ, изградбата на објекти во општини каде што има градоначалници од СДСМ не е никаква дискриминација.