Стартува гасификaцијата на скопскиот регион

Почнува проектот за гасификација на скопскиот регион со кој ќе бидат опфатени 17 општини. Инвестицијата од околу 100 милиони евра ќе се реализира за пет години по принципот на јавно-приватно партнерство, а дел од дистрибутивната мрежа ќе биде пуштен во работа во 2016 година.

Како што соопшти денеска премиерот Никола Груевски на прес-конференција во Владата, проектот предвидува гасификација на целата земја. Изградбата на дистрибутивниот систем ќе почне во 2015-та и за пет години, до 2019-та, треба да се реализираат најмалку 70 отсто од планираната инфраструктура.

– Од денеска почнува конкретната операционализација на проектот за гасификација во Република Македонија. Во изминатите неколку години интензивно и посветено работевме на завршување на сите мерки, активности и процедури за да дојде до оваа точка. Тоа не бешне нималку лесна и едноставна работа иако некои структури се обидуваат да ја прикажат така – рече Груевски.

Проектот, додаде, ќе биде изведен по сите стандарди, не парцијално, туку интегрално, без импровизации, туку со цврсти планови и програми.

– Беа потребни многу подготовки, изработка на мега проекти, средување на имотно-правни и земјишни односи, правање многу анализи и, секако, најбитното, требаше да се обезбеди темел, договор за снабдување со гас на цела Македонија. Посветено и одговорно, трпеливо и интензивно, за повеќе од четири години сработивме се што е потребно и обезбедивме договор со Руската Федерација за снабдување со гас и го реализиравме клучниот предуслов
за почеток на гасификацијата – потенцира премиерот.

Со гасификацијата, освен општините во Скопје, опфатени ќе бидат уште седум од околината, Сопиште, Зелениково, Студеничани, Петровец, Илинден, Чучер Сандево и Арачиново. Според анализите, заштедата на граѓаните кои за загревање користат парно, дрва, струја и екстра лесно гориво ќе бидат драстично намалени. Ако објект што се грее на парно биде приклучен на природен гас годишно ќе заштеди 24 отсто, ако е за домување, или 30 проценти ако е комерцијален.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.