Осум македонски компании од текстилната индустрија ќе се презентираат пред европските фирми

Во Копенхаген денеска осум наши компании од текстилната индустрија ќе имаат средба со фирми од Северна Европа на која ќе ги презентираат своите производи и услуги.

На средбата, европските увозници ќе имаат можност да се запознаат и воспостават деловни партнерства со македонските текстилни компании: „Албатрос“, „Еуросолид“, „Виеми“, „Алекс“, „Верамонд“, „Алзама“, „Линеа“ и „АСМ“. Нивни претставници утре ќе го посетат Меѓународниот саем за мода во Копенхаген.

Средбите се во организација на Агенцијата за странски инвестиции и промоција на извозот на Република Македонија (Invest in Macedonia) заедно со Проектот на УСАИД за унапредување на инвестирањето и извозот (IDEAS), Швајцарската програма за промоција (SIPPO) и Текстилно трговско здружение на Македонија.

– Целта на деловните средби е презентација на македонските фирми пред европскиот пазар, воспоставување директни контакти и преговори со потенцијални купувачи, обезбедување корисни информации во однос на пазарните трендови, конкурентноста, технологијата и цените. Средбата ќе овозможи и подобро позиционирање на македонските фирми на меѓународните пазари – соопштуваат од Проектот на УСАИД за унапредување на инвестирањето и извозот (IDEAS).

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.