Груевски: Студиите на ФАМУ во Охрид за неколку години ќе прераснат во регионални

Во Охрид ќе почнат постдипломски студии по филмско сценарио според програмата на престижната Академија за филмска и телевизиска уметност ФАМУ во Прага, кои ќе бидат дел од Универзитетот „Гоце Делчев“ Штип.

Премиерот Никола Груевски денес истакна дека постдипломските студии ќе се предаваат на англиски јазик, а се очекува да почнат кон крајот на март или почетокот на април.

– Дипломата што ќе се добива по завршување на овие студии ќе ја има истата важност и ќе биде призната како дипломата издадена од ФАМУ во Прага. Станува збор за една од најстарите и најреномирана филмска академија во светот. Годинава почнува со оваа насока, но се очекува в година да бидат покриени и други делови од филмската уметност. За 5-6 години студиите ќе се комплетираат и очекувам овие студии да прераснат во регионални – истакна Груевски.

ФАМУ е основана во 1947/1948 година и е петта најстара филмска школа во светот. Од неа произлегле познати имиња во филмот и литературата, како Милош Форман, Милан Кундера, Јиржи Менцл, Вацлав Хавел, Лордан Зафрановиќ, Емир Кустурица.

Премиерот Груевски нагласи дека дипломата од дисперзираните студии во Охрид  ќе биде заедничка со дипломата на ФАМУ и ќе биде идентична по квалитет, што е од особено значење за идните сценаристи.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.