Владата донесе одлука да го прифати предлогот на Министерството за финансии да се продолжи рокот за откуп на дворните места по едно евро за метар квадратен. Ова денеска го истакна вицепремиерот и министер за финасии Зоран
Ставрески, одговарајќи на новинарско прашање.
Тоа е исклучително добар проект, како што рече, кој наиде на огромен интерес кај граѓаните во 2009 година, кога го почнавме проектот, до крајот на 2012 година.
– Вкупно 162 илјади семејства или лица поднесоа барање за откуп на дворното место за едно евро за метар квадратен. Сепак, има одреден број граѓани кои поради различни причини, како на пример не ја слушнале информацијата дека истекува рокот, биле во странство или почнале оставинска постапка и немале време да ја завршат, бараат дополнителен рок. Владата им излегува во пресрет на тие граѓани, рече Ставрески.
Според него, веројатно се работи за десетина илјади граѓани кои во оваа обновена постапка или во рок од девет месеци ќе можат да поднесат барање.
– И на тој начин, под рамноправни услови, како и претходно, ќе можат да го купат дворното место за едно евро за метар квадратен. Да им го остават на своите поколенија и да можат да го користат понатаму за доградба или надградба на куќата, рече Ставрески.
Тој додаде дека сите постапки завршуваат согласно законите и процедурите. Потсети дека на почетокот дале рок со цел да поднесат барање дури и оние кои немаат комплетна документација или да им се излезе во пресрет.
– Кога така се прави, потребно е време за по службена должност да се обезбеди документацијата, која не секогаш е расположлива. Штом се заврши комплетирањето на документацијата, му се одговара на граѓаниот и тој може да го купи земјиштето, истакна Ставрески.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
