Доделени 40 решенија за легализација во Кисела Вода

Градоначалничката на општина Кисела Вода, Билјана Беличанец–Алексиќ, денеска додели решенија за легализација на бесправно изградени објекти на 40 граѓани од општината.

Во своето обраќање градоначалничката Беличанец-Алексиќ  упати апел до сите жители на општината да не го злоупотребуваат процесот на легализација и да градат нелегално во овој вакуум-простор, бидејќи ќе се соочат со општинската градежна инспекција.

– Општинската градежна инспекција е перманентно на терен и секоја нелегална градба која ќе се детектира, а не е подведена под Законот за третман на бесправно изградени објекти, односно нема легална документација за градба, веднаш ќе биде урната. Под тоа се подразбира секоја доградба и надградба на постојните нелегални објекти, но и секоја нова градба која е почната, а е со некомплетна документација и не се гради во согласност со нормативите на Законот за градење – рече Беличанец-Алексиќ.

Таа истакна дека при легализацијата на дивоизградени објекти главна улога имаат граѓаните и Општината и уште еднаш ги повика сите граѓани да ја комплетираат својата документација.

– Крајниот рок за доставување на елаборатот е 18 јуни 2014 година, што подразбира дека граѓаните имаат само уште неколку месеци за да ја докомплетираат документацијата, односно да го достават геодетскиот елаборат – рече Беличанец-Алексиќ.

Таа потсети и на мерките на Владата за финансиско олеснување на процесот на легализација за социјално ранливите категории, на кои им овозможи да плаќаат половина од цената за геодетските елаборати, а укажа и на фактот дека бенефитот од успешно заокружување на процесот на легализација ќе биде заеднички. Граѓаните ќе станат сопственици на нивните имоти, а Општината ќе може да донесе нови детални урбанистички планови, во кој ќе бидат впишани и новолегализираните објекти, што е и крајна цел на овој процес.

– Општина Кисела Вода веќе почна со носење на неколку клучни урбанистички планови, кои се во согласност со новиот ГУП на Град Скопје, а се во насока на рамномерен просторен развој, рационално уредување и користење на просторот и создавање услови за хумано живеење и работа на граѓаните. Со новите детални урбанистички планови, на граѓаните и бизнис-заедницата им даваме шанса за изградба на нови објекти и проширување и реконструкција на постојните, но само во законски пропишаните процедури – потенцира  Беличанец-Алексиќ.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.