Премиерот Никола Груевски во посета на Словенија

Премиерот Никола Груевски денеска ќе престојува во посета на Словенија при што ќе реализира средби со словенечкиот државен врв.

За време на еднодневната посета Груевски ќе има тет-а-тет средба со словенечката премиерка Аленка Братушек, а ќе се сретне и со претседателот на Република Словенија Борут Пахор, како и со претседателот на Собранието Јанко Вебер.

Предвидено е да се одржи и Пленарната седница на делегациите, предводени од премиерите Никола Груевски и Аленка Братушек заедно со ресорните министри. По завршување на седницата ќе се потпише Меморандумот за соработка од областа на спортот, кој што ќе го потпишат директорот на Агенцијата за млади и спорт на Република Македонија, Александар Пујовски и министерот за образование, наука и спорт на Република Словенија Јернеј Пикало.

Во состав на владината делегација која ја предводи премиерот Груевски се и министрите за надворешни работи Никола Попоски, за траспорт и врски Миле Јанакиески и за образование и наука Спиро Ристовски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.