Египќаните во земјава очекуваат унапредување на своите права

НВО Коалицијата на Египќаните не се задоволни од остварувањето на нивните права. Тие од претседателот Ѓорге Иванов, побараа да им помогне на припадниците на овој автохтон етникум во насока на остварување на нивните уставно загарантирани права и слободи, особено во полето на нивна институционална интеграција, во полето на образованието, културата и севкупното живеење, за да се спречи нивното етапно, тивко асимилирање и претопување во други етникуми.

Демир Далип, предводник на ОПЕМ и овластен преставник на Египќаните за надворешна соработка вели дека во март 2011 година, по барање на движењето ОПЕМ, Иванов се сретнал со делегација на Египќаните во Република Македонија. На средбата Иванов во детали бил информиран за загрижувачката состојба во која се наоѓаат Египќаните во земјава, како и за опасноста од нивно претопување и исчезнување од етничката карта во Македонија.

-Како што одминува времето, мојот народ етапно ја губи надежта дека ќе се подобри нивната позиционираност на маргините на севкупното живеење, и оваа состојба е дојдена до таа фаза каде сме приморани да апелираме и алармираме за поддршка на овој автохтон етникум. Таквата поддршка мојот народ недвосмислено ја заслужува. Иако засега многу тешко оди имплементацијата на Законот за унапредување на правата на припадниците на заедниците кои се помалку од 20% од населението во Република Македонија, а особено членот 4 од истиот закон, кој ги става во подредена состојба припадниците на етничката заедница Египќани во Македонија, се надеваме дека ваквата состојба ќе биде надмината во интерес на развојот на мултиетничката демократија во нашата заедничка татковина, Република Македонија“, вели Демир Далип.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.