Тодоров: Министерството за здравство ќе го покрие осигурувањето за продолжено породилно отсуство

Министерството за здравство ќе го покрие осигурувањето за продолженото породилно отсуство, вели министерот Никола Тодоров, објави „МКД“. Тој вели дека предлогот на Министерството за труд и социјална политика за продолжување на породилното за неплатени три месеци, неговото министерство е подготвено да го покрие.

-Тој дел финансиски ќе биде покриен од програма на Министерството за здравство за да нема прекин во осигурувањето на жената што одлучила да добие три месеци дополнително породилно отсуство и потоа да нема проблем да добие определена здравствена услуга, вели Тодоров.

Според Тодоров, буџетот нема да биде многу оптоварен со помагање на мерката на МТСП.

-Тоа не би требало да бидат големи средства, имајќи предвид дека ќе се оди со програмата за привремено неосигурени лица, што е прилично голема, над милијарда годишно. Не очекувам дека средствата тука ќе бидат значително големи. Станува збор за три месеци, а имаме околу 20.000 породувања годишно, рече Тодоров.

МТСП предлага породилното отсуство да се продолжи за три месеци кои на мајката нема да ѝ бидат платени. Според предлогот на министерството, дополнителните месеци мајката може да ги искористи веднаш по истекувањето на регуларните девет месеци или до навршувањето на три години на детето.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.