По неуспехот на разговорите за спорот за името во Њујорк, неизвесни се следните чекори на посредникот во разговорите, амбасадорот Метју Нимиц. По двочасовната средба во седиштето на Обединетите нации, Нимиц кажа дека не знае како понатаму, а и претставниците на Македонија и Грција, Зоран Јолевски и Адамантиос Василакис, не дадоа најави за нова средба, јави дописникот на МИА од САД.
Василакис, во разговор со единствената грчка новинарска екипа во Њујорк, рече дека на средбата не била донесена одлука дали Нимиц би свикал нова средба во Обединетите нации или би го посетил регионот, и кога би можело да се очекува таков потег.
Во својата изјава по средбата, амбасадорот Нимиц посочи дека постојат сериозни разлики меѓу двете земји по прашањето на спорот.
– Претставниците на двете страни зборуваа меѓу себе за отворените прашања. Како што знаете, јас претставив еден документ во април за кој разговаравме отворено при мојата посета на регионот. Темелно разговаравме за мојата посета на регионот, да ги видиме кои се ставовивте во врска со ова прашање и можностите за постигнување решенија. Имавме доста отворена дискусија но неможам да кажам дека е постигнат договор. Имаме добри идеи на масата, но се уште има сериозни разлики меѓу двете страни и тоа не го негирам, изјави амбасадорот Нимиц.
Нимиц, кој не откри повеќе детали за содржината на неговиот предлог од април, сепак потврди дека главно прашање на недоразбирање меѓу двете земји е опсегот на употребата на евентуалното ново име откако Грција, за време на неговата посета на регионот во септември, соопшти дека за неа е прифатлива единствено формулата ерга омнес – едно име за сите употреби.
– Владата во Атина имаше забелешки за мојот предлог. Потоа и Владата во Скопје имаше свои забелешки и ставови. Едно од прашањата е опсегот во кој би се користело името, доколку претпоставиме да имаме согласност за име, каде би се користело тоа, во која форма, колку опширно. Јас претставив мој предлог за тоа, а имаше различни ставови во Атина и во Скопје. Тоа што двете страни имаат силно изразени мислења дали сакаат или не сакаат нешто во мојот предлог, не значи дека во целост ќе го заборавиме предлогот, изјави Нимиц.
Претставникот на Обединетите нации остави отворена врата за македонскиот предлог за организирање разговори на високо ниво, меѓу премиерите на двете земји, предлог кој Грција засега го одбива. Овој предлог, претседателот на македонската Влада Никола Груевски го претстави на средбата со генералниот секретар на Обединетите нации Бан Ки-мун во септември.
– Разговараме за различните форуми за разговори, тоа секогаш е можност, изјави Нимиц. Од Обединетите нации за МИА велат дека генералниот секретар, доколку процени дека тоа е потребно и доколку двете страни се согласни, може да донесе одлука и лично да се ангажира за да го поттикне придвижувањето на разговорите напред.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
