Коридорот 8 ќе се вика Мајка Тереза

Мајка Тереза

Коридорот 8 во Македонија се вика Мајка Тереза, нејзиниот лик ќе го има на банкнота, а Субрата Рој, покрај огромен споменик во центарот на Скопје, во нејзин спомен, ќе гради и дом за стари и изнемоштени лица во околината на Скопје. Во текст посветен на големата хуманитарка, објавен во индискиот медиум „Тајмс оф Индија“, се претставени нови планови на македонската Влада, но и на индискиот милионер, кој досега најави и повеќе други проекти низ земјава, пренесува „Утрински“.

Премиерот Никола Груевски, во изјава за „Тајмс оф Индија“, вели дека била донесена одлука еден од најдолгите и најважните автопатишта на Балканот да го носи името на големата хуманитарка. „Еден од најважните автопатишта во регионот, долг околу 300 километри е именуван по Мајка Тереза. Тој го поврзува Скопје со Бугарија и со Албанија. Дел од него веќе постои, а дел ќе треба да биде доизграден до 2017 година“, вели премиерот за „Тајмс оф Индија“.

Индискиот бизнисмен засега се’ уште бара земјиште кое е на продажба и на кое ќе може да го изгради домот за стари лица во околината на Скопје. „Се работи за ветување кое Рој и’ го дал на Мајка Тереза, дека еден ден ќе изгради ваков објект. Тој одлучи тоа да биде во Скопје“, велат од групацијата „Сахара“.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.