Седумте приказни на Гоце Стевковски

Излегува албумот 7 Stories на џез септетот на Гоце Стевковски, во издание на Филтер.

Откако својата кариера ја исполни со соработки со речиси сите позначајни џез и рок состави и автори на македонската музичка сцена (Леб и сол, Кирил Џајковски, Архангел, Проџект Жлуст, Никола Коџабапија и др.), еден од најдобрите тапанари во регионот започнува ново поглавје во својот уметнички живот. Станува збор за септет во кој, покрај фронтменот, членуваат уште шест извонредни инструменталисти: Кире Кузманов, Иван Иванов, Трајко Велков, Дамир Имери, Сашко Николовски и Александар Икономов, додека перкусионистот Оскар Салас се јавува како гостин на некои од композициите.

Она што е особено интересно за овој проект е што покрај лидерската позиција во бендот, Стевковски го понел и товарот на авторството на сите седум композиици на изданието. И тука веројатно се крие најпријатното изненадување на албумот, затоа што тој се потврдува и како одлилен композитор. Аранжманите оставаат доволно простор за секој од музичарите да ги покаже своите способности преку соло делници, но звучат и доволно „стегнато“ за да поминат одлично кај пошироката публика.

Септетот остава впечаток на добро увежбан бенд составен од врвни професионалци кои се движат со леснотија низ жанровски разновидниот материјал на албумот – од теми со латино призвук, преку афро-кубански и блуз влијанија, па се’ до поезотерични композиции, што не’ враќаат во златното време на ECM. 7 Stories е албум што ја започнува приказната за еден нов македонски џез состав. Судејќи според почетокот, сигурни сме дека ќе биде долговечна и успешна.

Албумот на Goce Stevkovski Septet ќе излезе на 12август, а ќе биде достапен преку сите водечки онлајн музички продавници и стриминг сервиси.

FILTER087_GoceStevkovskiSeptet_7Stories

Goce Stevkovski Septet – 7 Stories (FILTER087)

1. 7 Stories – (5:09)

2. 7 Rivers – (4:57)

3. 7 Days – (4:48)

4. 7 Dwarfs – (5:55)

5. 7 Sins – (4:52)

6. 7 Wonders – (6:22)

7. 7 Mountains – (2:50)

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.