Хиршер и Мазе импресивни во денешните ски трки

Австриецот Марсел Хиршер имаше страшен втор настап во Кицбил за четврта слаломска победа сезонава во Светскиот куп во алпско скијање. Лидерот во бодувањето надокнади се, во домашниот натпревар во Тирол и на крајот зад себе ги остави Феликс Нојројтер и Ивица Костелиќ кој пак, освои дополнителни сто бодови затоа што седмиот слалом и вчерашниот спуст се бодуваа и за алпска комбинација. 23 годишниот Хиршер води со големи разлики и во најтехничката дисциплина и во генералното бодување и како голем фаворит го очекува Светското првенство во Шладминг од 5 февруари.

Според резултатите, убедливото водството во вкупното бодување, па и според формата потврдена со триумфот во велеслаломот во Марибор и Тина Мазе се наметнува како сериозен кандитат за мултимедалист на престојниот алпски шампионат. Словенката денеска беше извонредна на вториот дел од популарната “Златна лисица” и славеше со цели 86 стотинки подобро време од Фрида Хансдотер и повеќе од секунда од Катрин Цетел. Според бодовната разлика што ја создаде досега, само чудо на Мазе може да и ги одземе кристалните глобуси во велеслалом и за Ол раунд настапот во Светскиот куп.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.