Стартот на традиционалниот 41-ви по ред турнир на отвореното ракометно игралиште „Женска плажа“ во Струга оваа година ќе се одржи од 14 до 17 август.
Струга е вистински расадник на ракометари кои во минатото, а и во моментов ги бранат боите на најголемите македонски клубови и секако националната селекција. Во овој момент десетина од нив настапуваат во неколку екипи во нашето првенство, а од нив дури осум ги бранат боите на Металург и се моторот на тимот кој минатата сезона ги достигна европските височини и предизвика вистинска ракометна еуфорија во нашата Македонија.
Наумче и Златко Мојсовски, Ацо Јоновски, Велко и Никола Маркоски, Марко Неловски, Гоце Ојлески и најмладиот Никола Костески моментално на Златибор се подготвуваат за овогодинешните искушенија на Металург, но со нетрпение го очекуваат турнирот во Струга, местото каде ги направиле своите први ракометни чекори и на теренот на кој за прв пат имаа шанса пред ракометна Македонија да покажат што знаат и умеат.
-Навистина сме многу благодарни на сите луѓе во и околу клубот што сите овие години на ваков или онаков начин помогнаа во неговиот развој и ни овозможија на сите нас кои сме родени во Струга постигнеме нешто за што сонувавме од најрана возраст, а тоа е да играме во најдобрите наши клубови и да ги браниме боите на нашата земја Македонија – вели Наумче Мојсовски.
–Годинава турнирот е навистина квалитетен и ветува големо ракометно уживање и неизвесност во врска со крајниот победник. Временските услови се одлични, а Струга со езерото нуди комплетно летно уживање – додаваат Јоновски и Марковски.
– Ова е најмалку што можеме да направиме за нашата Струга – се согласуваат останатите колеги и сите заедно на спортска Македонија ѝ порачуваат:
ДОЈДЕТЕ ВО СТРУГА НА ВРВЕН РАКОМЕТ ПОКРАЈ ЕЗЕРСКА ИДИЛА!
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
