Обама ќе го притиска Самарас за решение за името?

Андонис Самарас на средбата со американскиот претседател Барак Обама, која е закажана за в четврток, ќе разговара и за проблемот за името, пишуваат грчките медиуми, пренесува „Телеграф“.

Грчките весници, повикувајќи се на дипломатски извори, пишуваат дека Самарас ќе се соочи со огромен притисок.

Весникот „То Вима“ објави дека состанокот ќе се одржи неколку недели пред отворањето на сериозните национални прашања во врска со Кипар и името на Скопје. Провладиниот „Катимерини“ во текстот за средбата на грчкиот премиер со американскиот претседател потсети дека Вашингтон е подготвен да се активира за решавање на кипарскиот проблем и прашањето за името на Македонија.Весникот „Парон“, пак, напиша дека Обама ќе изврши голем притисок врз Самарас.

– Пораките што пристигнуваат од преку Атлантикот се јасни и не многу оптимистички… Вашингтон сака ова прашање да се реши колку што е можно побргу, доколку е можно и до крајот на 2013 година и на состанокот на 8 август Обама ќе бара да се прецизира – се наведува во грчкиот весник.

Самарас во Њујорк ќе се сретне со американски бизнисмени со грчко потекло, а по средбата со Обама, ќе има и одвоени средби со градоначалникот Мајкл Блумберг, генералниот секретар на ОН, Бан Ки-Мун, и претседателот на Американскиот еврејски комитет, Дејвид Харис.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.