Грчко „добредојде“ и три нови инциденти за македонските гости

Три семејства кои одлучиле својот одмор и празниците да ги поминат во соседна Грција повторно се соочија со оштетувања на возилата.

Оваа сабота на граничниот премин „Богородица“, Ѓ.Х. кој патувал со патничко возило „Југо Корал“ со скопски регистерски ознаки, пријавил дека комплет табличките му биле украдени во туристичкото место Неа Пори. Оштетениот го пријавил случајот и во грчката полиција.

Еден ден подоцна, на 3-ти август на граничниот премин „Стар Дојран“ се пријавени уште два случаи. Во првиот М.Д. кој патувал со патничко возило „Мерцедес“ со беровски регистерски ознаки, пријавил дека  туристичкото место Полихроно, со спреј му била прекриена ознаката МК, но случајот не го пријавил и во грчката полиција.

Во вториот случај, исто така на Граничниот премин „Стар Дојран“, Ж.К. кој патувал со возило „Фолксваген Пасат“ со струмички регистерски ознаки, пријавил дека во туристичкото место Лептокарија, му биле украдени комплет табличките, а кражбата ја пријавил и во грчката полиција.

Со овие новорегистрирани случаи, во изминатиот период од страна на нашата гранична полиција евидентирани се 32 одземања, односно кражби на регистарски таблички во кои во повеќето или во 23 случаи се украдени обете таблички. И натаму предничи туристичкото место Ханиоти каде што досега се евидентирани 13 кражби и Неа Пори со шест. По однос на оштетените возила бројката на вакви настани сега нарасна на 7 случаи.

Од вкупниот број случаи – 24 се пријавени од страна наши државјани и на грчката полиција, но досега МВР се уште нема добиено никаква информација од грчките колеги за случаите. Осумнаесет од македонските граѓани кои пријавиле кражба или оштетување се од Скопје, а останатите од други места во државава.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.