Перо Антиќ ќе има деби од соништата за Атланта хоукс во НБА, а прв противник ќе му биде легендарниот крилен центар Тим Данкан со Сан Антонио спарс. Ако сѐ оди според планот, капитенот на македонската репрезентација би требало да настапи на претсезонскиот дуел против актуелните шампиони на Западната конференција и лански финалисти, на 18 октомври со почеток од 1.30 часот по полноќ по македонско време.
За Спарс играат и НБА-ѕвездите Тони Паркер, Ману Џинобили, Трејси Мекгредјди, кошаркари со огромен рејтинг во најсилната светска лига. Мечот ќе се игра во арената „Филипс“ во Атланта, а распоредот на домашни претсезонски натпревари на популарните „јастреби“ е мошне интересен.
По премиерата со Спарс ќе следи дуел со Мемфис на 21 октомври и со Индијана две вечери подоцна. Сите три екипи што ќе гостуваат во арената „Филипс“, ланската сезона играа во финалните мечеви по конференции, што значи дека Антиќ ќе има вистински тестови уште пред стартот на новиот циклус во НБА.
Мемфис и Сан Антонио играа меѓусебе во западното финале и серијата ја добија Спарс со 4-0, а Индијана го намачи шампионот Мајами и загуби во максимални 7 натпревари со 3-4. Во претсезонските натпревари тимовите речиси секогаш настапуваат во комплетен состав, но повеќе шанса им се дава на резервите или на кошаркарите што неодамна пристигнале во клубот.
Лани, Атланта во претсезонски меч гостуваше во Сан Антонио и загуби со 99-101. Распоредот на натпреварите на кои Хоукс ќе бидат гости, допрва треба да биде објавен на официјалната страница на клубот. Пред да се пресели во НБА и во Атланта, тим за кој потпиша двегодишен договор, Антиќ ќе игра на Евробаскетот во Словенија, од 4 до 22 септември, секако во дресот на Македонија.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
