Мицкоски: Фингирани прослави додека народот едвај преживува(галерија)

-Македонија има сила, а силата е народот. Има и мудрост. Од нас зависи, од сите нас за тоа каква иднина ќе градиме, Македонија мора да стане на нозе, Македонија со силна економија, и среќни граѓани – напиша лидерот на ВМРО ДПМНЕ, Христијан Мицкоски на својот Фејсбук профил по денешната посета на Прилеп .

Ова е неговиот статус интегрално:

Денес бев во Прилеп. Имав можност да поразговарам со прилепските пазарџии и со младите од овој град.

Едногласен е впечатокот за тешкиот живот на граѓаните, овде во реалноста, излегувајќи од розевата слика на власта, наспроти фингираните прослави со кои се слават поразите, е нова борба за живот на дневна основа, нова грижа, нова несигурност и неизвесност за тоа како ќе се преживее денот.

На пазарот го сретнав стариот пазарџија Стојан кој со своите 80 години стои на жешкото сонце и продава намирници, вели не дека сакам, но имам внучиња за гледање, се борам да ги задржам тука бидејќи нивните врсници одамна заминаа. Друг ми вели ако тука на пазарот со моите две раце не заработам за живот никој нема да ми помогне, нема да дојде иднина ако сам не си ги засукам ракавите, бајките на власта се едно, но овде е реалниот живот.

Се сретнав и со младите кои ми кажаа дека Прилеп е запоставен град од власта, шајка не закова владата и општината во последниов период, а како тргнало сигурно нема ниту да биде подобро. Со грутка во грлото зборуваат и за достоинството и честа кое владата го одзема со договорот со Грција. Велат без иднина, и без името Македонија е истото како на дрво да му го одземете коренот, ниту ќе расте ниту ќе дава плодови. Им велам може и мора да биде подобро. А Македонија има сила, а силата е народот. Има и мудрост. Од нас зависи, од сите нас за тоа каква иднина ќе градиме, Македонија мора да стане на нозе, Македонија со силна економија, и среќни граѓани.

Нашата борба е за иднината на секој еден од вас, за обезбедување на сигурност и шанса, за Македонија која победува!

После дождот секогаш доаѓа сонце, напиша Мицкоски на Фејсбук.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.