Филмскиот работник Панта Мижимаков е добитник на наградата „Златен објектив“ за 2018 година, која Кинотеката на Македонија ја доделува за исклучителен придонес во македонската кинематографија.
Наградата на Мижимаков ќе му биде врачена на 3 мај годинава во киносалата на Кинотеката на Македонија. По свеченото доделување на „Златниот објектив“ ќе се одржи и проекција на краткиот документарен филм „Ликвидатор“ во режија на Трајче Попов. По завршувањето на проекцијата ќе има разговор со Панта Мижамаков на кој ќе бидат присутни истакнатите филмски работници: Илинденка Петрушева, Русомир Богдановски и Столе Попов.
Како што информира Кинотеката на Македонија, запишувањето на Академијата за театар, филм, радио и ТВ во Белград коинцидира со професионалниот ангажман на полето на кинематографијата на Панта Мижимаков, најпрвин со статус на слободен филмски работник, а подоцна наизменично како вработен во „Вардар филм“ и слободен филмски работник.
Често работел на копродукциите и странските продукции кои се реализираат во Македонија и Југославија, а работел и за југословенски продуценти на повеќе филмски проекти („Шеќерна водичка“, „Полтрон“…). Во „Вардар филм“ соработувал на поголем број кратки, документарни и играни филмови кои на шпиците не го наведуваат неговото учество во продукцијата. Од 1991 е еден од основачите и директор на приватната продуцентска куќа „Пегаз“, со којашто има реализирано неколку филмски проекти.
Кинотеката на Македонија го доделува „Златниот објектив“ како признание на поединци кои со своето професионално делување придонеле македонската кинематографија да се создаде, развива, промовира и популаризира. Досегашни добитници на оваа награда беа режисерите Бранко Гапо и Кирил Ценевски, тонскиот снимател Глигор Паковски, аниматорот и карикатурист Дарко Марковиќ, директорите на фотографија Драган Салковски и Љубе Петковски, доајените Благоја Дрнков, Трајче Попов, Коста Крпач, Илинденка Петрушева.
Селективна филмографија: 1972 „Истрел“, водач на снимање, игран, Филмско студио Скопје, Босна филм Сараево 1973 „Татко“ (Колнати сме Ирина) водач на снимање, игран, Филмско студио Скопје, Центар на ФРЗ Белград 1976 „Најдолгиот пат“ водач на снимање, игран, Вардар филм 1977 „Пресуда“ водач на снимање, игран, Вардар филм 1977 „Исправи се Делфина“ водач на снимање, игран, Вардар филм, Македонија филм 1977 „Винојуг“ организатор, документарен, Вардар филм 1981 „Црвениот коњ“ водач на снимање, игран, Вардар филм, Македонија филм 1997 „Преку езерото“ учесник во екипа, игран, Вардар филм, Логос филм Полска 1997 „Џипски меџик“ менаџер на продукција, игран, Вардар филм, Триангл Скопје.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
