Грчка полиција: На протестот „Македонија е грчка“ учествувале 140.000 граѓани, избиле судири меѓу демонстрантите

Грчката полиција соопшти дека на протестот „Македонија е грчка“ во центарот на Атина, учествувале 140 илјади граѓани, кои од цела Грција дошле со 283 автобуси, јавува Македонската информативна агенција (МИА). Паралелно со протестот на „Синтагма“, на оддалеченост од околу 800 метри, анархистички и антифашистички организации одржале контра-протест, по што дошло до судири, а полицијата реагирала со солзавец.

На протестот говорел грчкиот композитор Микис Теодоракис, митрополити од Грчката православна црква и претставници на организаторите. Теодоракис упатил остри критики до грчката влада, кажал дека Македонија е грчка и побарал референдум.

– Ако една грчка влада помисли да го стави потписот на земјата за сложено име, нема друг избор освен да го праша грчкиот народ. Упатувам повик до пратениците, кои го имаат тоа право да побараат референдум, рече Теодоракис.

Куќата на грчкиот композитор била испрскана со црвена боја, пред тој да се појави на протестот.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.