Скопје повторно се најде на неславната листа на интернет-страницата AirVisual, која ги рангира градовите со најзагаден воздух во светот. Денеска на пладне, главниот град на Македонија беше на четвртото место во светот според аерозагадувањето, зад Приштина во Косово, Лахоре во Пакистан и Ханџу во Кина.
Рангирањето доаѓа откако вчера мерните станици за квалитет на воздухот измерија огромно загадување на сите мерни станици во Скопје, од 4 до 12 пати над дозволениот максимум. Највисоките концентрации се забележани синоќа во 20 и 21 часот на мерните станици „Лисиче“ – 600 и „Ректорат“ – 530 микрограми на метар кубен ПМ-10 честички.
Покрај Скопје, огромно загадување од 5 до 10 пати над максимално дозволениот лимит бил регистриран и на мерните станици во останатите градови низ Македонија. Највисоките пикови биле во Струмица (500), Битола (360), Гостивар (330), Кавадарци (300), Велес (245) и Тетово (240).
Властите информираа дека на средбите на ресорните министерства и Град Скопје договориле еколошките налепници, што треба да ги добијат автомобилите во Скопје, да се уредат со измени на Законот за животна средина. Налепниците кои ќе се однесуваат на движењето на возилата во периодите на високо загадување се една од мерките за справување со проблемот.
Со законот ќе биде уредено и тоа како ќе се категоризираат возилата, односно возилото во станиците за технички преглед зависно од тоа кој ЕУРО стандард го исполнува ќе добие еколошка налепница со црвена, портокалова или зелена боја.
извор: radiomof.mk
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
