Мицковски: Минута до 12, апелираме на совеста на пратениците на СДС да не го поддржат договорот со Бугарија!

Овој договор не ги задоволува националните интереси на Република Македонија. Народот не го поддржува овој договор, а стручната јавност има сериозни забелешки на неговиот текст, рече Христијан Мицковски Генерален секретар на ВМРО-ДПМНЕ.

Тој посочи дека, Договорот вака конципиран и потпишан има сериозни недостатоци и веројатно последиците од неспособноста на Владата на Зоран Заев, Република Македонија ќе ги трпи во подолг временски период.

-Во овој Договор имаме срамна формулација за дефинирање на македонскиот јазик, немаме симетрија на правата и обврските што значи Договорот не е еквивалентен. Со договорот не се дефинира македонскиот народ како реална и идентитетска посебност, а Зоран Заев срамно и недостојно се откажува од грижата на македонското национално малцинство. Договорот предвидува опасна можност за промена на македонските учебници и останатите идентитетски обележја кои што се дел од нашето историско наследство. Она што е особено проблематично е што со овој договор Република Бугарија ќе има можност да го преиспита однесувањето на Република Македонија на целокупниот наш пат кон Европската Унија, бидејќи Заев прифати тие да имаат можност да не дозволат отворање на ама баш секое поглавје од преговорите за членство доколку не се исполнат нивните цели и позиции. Тоа значи нови проблеми и нови последици за Република Македонија. И за ова е одговорен и ќе биде одговорен исклучиво господинот Зоран Заев- рече Мицковски.

Тој додаде дека во Бугарија договорот се слави, а во Македонија, граѓаните имаат чувство на пораз и незадоволство, што беше многу видливо од прославите на Мечкин Камен и Пелинце каде што Социјалдемократскиот сојуз остана без народ.

-Ние немаме ништо против Република Бугарија, напротив мислиме дека Република Македонија и Република Бугарија треба да ги унапредат добрососедските односи на вистинско и на обострано задоволство и интерес, а македонскиот народ и бугарскиот народ да го унапредат пријателството и соработката. ВМРО-ДПМНЕ за оваа тема имаше и има долгогодишни, принципиелни и аргументирани позиции и ставови, и забелешки и предлози за подобрување на текстот на договорот, во насока на фер и квалитетно решение. Но Социјалдемократскиот сојуз не сакаше да се ангажира и да поработи на позитивен резултат. И затоа имаат одговорност. Базирајќи се на нашите ставови верификувани од Централниот комитет, ВМРО-ДПМНЕ нема да даде поддршка на овој договор- рече Мицковски.

Тој истакна дека ВМРО-ДПМНЕ бара од Социјалдемократскиот сојуз да се повлече.

-Не е доцна, минута до 12. Апелираме на совеста на пратениците на Социјалдемократскиот сојуз да не го поддржат овој договор. Не е доцна, вие пратениците од Социјалдемократскиот сојуз имате обврска и кон вашите предци но и кон вашите деца. Однесувајте се одговорно барем вие, оставете го господинот Зоран Заев сам на овој случај. Доколку тоа не го направите ќе останете на темните страници на историјата на Македонија, а Социјалдемократскиот сојуз многу брзо ќе сноси политичка одговорност, многу брзо уште на локалните избори, ние заедно со народот ќе ве поразиме и ќе ве делегитимираме, за да може да победи Република Македонија – посочи тој.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.