Владата на Заев не може да се справи со пожарите, бара меѓународна помош

Пожарот во село Требовље и Нова Брезница е локализиран. Во моментов се делува превентивно со хеликоптери и авиони, а дел од силите се пренасочени во Катланово, скопско, информира денеска на прес-конференција директорот на Дирекцијата за заштита и спасување Шабан Салиу и додаде дека наскоро со противпожарните авиони ќе се делува во атарот на Ѓорче Петров кон границата со Косово во кој гори недостапна шума.

– Во Требовље изгореа околу 300 хектари, а дејствуваме со околу 82 припадника на ДЗС и два хеликоптера. Беа присутни територијалните противпожарни единици од осум града. Во пожарот учествуваа и 20 припадници на Македонски шуми, а имаше и десетина од локалната самоуправа, рече Салиу и додаде дека помош добиле и од 60 припадници на Армијата на Република Македонија.

Директорот на ДЗС обвини дека вчерашниот пожар во Требовље се проширил поради неодговорното однесување на десетината лица ангажирани од локалната самоуправа кои се повлекле од договореното место каде што требало да го пресретнат пожарот со образложение дека биле договорени да помогнат до 12 часот дента.

Според Салиу пожарот е предизвикан од човечки фактор, бидејќи, како што рече, на наколку места во шумата биле забележани подготвени дрва за оган.

Помош во хеликоптер со корпа за вода, како што рече, била понудена од Бугарија.

Директорот на ДЗС информираше дека до овој момент имало интервенции врз 360 шумски пожари во кои изгорена површини има околу 590 хектари.

Кооринативното оперативно тело за заштита на шумите од пожари на денешната седница во Центарот за управување со кризи ја разгледа моменталната состојба со пожарите во регионот на општина Македонски Брод и донесе заклучок со кој се предлага Владата, преку Управувачкиот комитет, да започне активности за барање меѓународна помош од странство за поддршка од воздух.

– Кооринативното оперативно тело за заштита на шумите од пожари, по разгледување на состојбите и можностите на ресурсите и непристапноста на теренот,  предлага преку Управувачкиот комитет, Владата на РМ да започне активности за барање меѓународна помош од странство за поддршка од воздух на билатерална основа, се наведува во соопштението од ЦУК.

Координативното оперативно тело, се додава, согласно расположивите податоци и анализи, заклучи дека со пожарите во реонот на Македонски Брод успешно се справуваат во смисла на заштита на населените места, но дека е потребен натамошен ангажман на ресурсите на расположивите субјекти.

Од ЦУК информираат дека Кооринативното оперативно тело ја споделило препораката од Групата за процена и презело задолжувања за преземање мерки од страна на институциите за подигнување на будноста заради намалување на, како што наведуваат, несовесното и намерното предизвикување пожари, со посебен акцент за претстојниот празник.

На седницата на Кооринативното оперативно тело за заштита на шумите од пожари присуствуваа претставници од Центарот за управување со кризи, Инспекторатот за шумарство и ловство, Дирекцијата за заштита и спасување, ЈП „Македонски шуми“, ЈП за стопанисување со пасишта, ЗЕЛС и Министерство за транспорт и врски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.