Стотици демонстранти се собраа синоќа пред Даунинг Стрит 10 во Лондон, резиденцијата на британската премиерка Тереза Меј, за да го искажат гневот поради пожарот во кулата Гренфел и бараа нејзина оставка.
Тие сметаат дека Меј, која 7 години беше министер за внатрешни работи, е ко-одговорна за трагедијата која се случи со пожарот на кулата во Лондон во која загинаа најмалку 30 лица.
Вчера исто така десетици налутени манифестанти влегоа во општината на квартот во кој се наоѓа кулата. Во зградата имало социјални станови. Дојде и до тепачка со полицијата која се обидуваше да ги спречи да влезат во општината.
Демонстрантите носеа транспаренти на кои пишуваше „Срам да ви е!”, „Убијци”, „Правда за Гренфел”. Тие исто така бараа да биде уапсен газдата на претпријатието кое ја реновирало зградата. За демонстрантите социјалните станови се”смртна стапица” а одговорните тоа го знаеле. Станарите долго предупредувале дека реновирањето на зградата е лошо направено но никој не им обрнувал внимание. Реновирањето од минатата година врз фасадата всушност го проширило пожарот. Според некои медиуми, ваквото покривање на фасади е забрането во многу земји.
Истрагата за пожарот се уште не утврдила колку лица точно загинале во трагедијата и се уште има исчезнати лица.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
