Во заедничка акција на српската полиција и Министерството за здравство е откриена и запленета нова дрога која е 800 пати посилна од марихуаната.
– Станува збор за супстанца, синтетички канабиноид (5F-MDMB-PINACA), кој кај луѓето може да предизвика тешко нарушување на здравјето, изјави за весникот „Блиц“ Јелена Јанковиќ, раководител на Центарот за рано предупредување за нови психотропни супстанци при Министерството за здравство.
– Ова е светски важна вест, имајќи предвид дека информацијата од Србија преку системот за рано предупредување ќе ја добијат сите земји од ЕУ, истакнала Јанковиќ.
Според неа, во Србија оваа дрога веднаш ќе биде ставена на листата на забранети психотропни супстанци, а се очекува тоа да го направат и другите земји. Оваа супстанца припаѓа на групата психотропни супстанци кои можат да предизвикаат тешко нарушување на човечкото здравје.
– Синтетичките канабиноиди имаат 100 до 800 пати посилно дејство од канабисот и се јавуваат во облик на смола, бел прев, кристали, масло, додава Јанковиќ.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
