ЦСКА и Фенебахче со огромна предност во четвртфиналето, Антиќ на чекор пред фајналфор на домашен терен

ЦСКА Москва поведе со 2-0 во четвртфиналната серија против Басконија, откако актуелниот европски првак повторно налета на сериозен отпор од шпанскиот претставник, но сепак најде начин да стигне до победата. Рускиот првак на крајот триумфираше до минимални 84-82, благодарение на поените на Кајл Хајнс на една секунда до крајот на натпреварот, по што сега на тимот на тренерот Итудис му е потребна само уште една победа на следните три меча за да дојде до билет за Ф4 турнирот во Истанбул.

Во меч кој многу наликуваше на првата пресметка од пред два дена, ЦСКА во неколку наврати стигнуваше до солидно водство, но гостите од Шпанија покажуваа фантастичен карактер и успеваа да се вратат. На три минути до крајот домаќините водеа со девет поени разлика (77-68), но Басконија направи огромен камбек и со тројката на Бобуа на 14 секунди до крајот израмни на 82-82 ЦСКА го имаше последниот напад, но откако Теодосиќ промаши на вистинското место се најде Хајнс, кој изнуди лична грешка, по што со две слободни фрлања на една секунда до крајот му ја донесе победата на актуелниот шампион на Европа.

Теодосиќ беше најефиксен кај ЦСКА Москва со 16 поени, пред Хајнс и Де Коло со по десет, додека прв стрелец на натпреварот беше гостинскиот плејмејкер Бобуа со 21 поен.

Перо Антиќ е на добар пат повторно да атакува на европската круна откако со тимот на Фенербахче повторно славеше на гостински терен против Панатинаикос, овојпат со 75-80, за огромна предност од 2-0 во победи во пресрет на двете средби во Истанбул што ќе бидат на програмата следната седмица. Откако претходно освои две титули европски првак, а лани несреќно загуби во финалето од ЦСКА, македонскиот ас најверојатно ќе има нова шанса да стигне до трета круна, и тоа на Ф4 на домашен терен во Истанбул.

Денешниот дуел во Атина повторно го одбележа рововска битка на двата тима, во која во завршницата поснаодливи беа гостите од Турција и а заслужено стигнаа до победата. Богдан Богдановиќ одигра уште еден одличен меч погодувајќи неколку клучни шутеви, но ПАО успеа да се врати и по грешката на Боби Диксон домашниот тим имаше шут за водство на половина минута до крајот. Сепак, обидот на Риверс беше непрецизен, по што следеа лични грешки на играчите на ПАО по кои Фенербахче само си ја осигура победата.

Антиќ одигра осум минути, период во кој реализираше три поени и два скока, а најдобри поединци кај Фенербахче беа Богдановиќ со 25 и Удох со 22 поени.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.