Со „Претстава со четири актери, неколку свињи…“ на истакнатиот косовски режисер Блерта Незирај, синоќа во Драмскиот театар, беше отворено 10-то јубилејно издание на интернационалниот театарски фестивал „Лица без маски“. Претставата по текст на Јетон Незирај, а во изведба на „Кендра мултимедија“, на ироничен начин третира актуелна политичка тема, за излегувањето на Велика Британија од ЕУ и апетитите на Косово за влез во организацијата.
Токму орвеловскиот свет е присутен на годинешната програма на фестивалот „Лица без маски“. На програмата се и: „Фарма“, според култниот роман на Џорџ Орвел, во изведба на италијанскиот театар „Софиа Амендолеа“, рускиот „32. физички театар“ со претставата „Ноќта на огнот“, бугарската веќе хит-претстава „Сѐ на масата“ од Ч. Буковски, а во режија на Ана Батева, кои исто така ги третираат актуелните општествени околности на глобално ниво.
– По повод јубилејот, годинава, покрај интернационалната програма, имаме и македонска независна продукција, која кореспондира со начелата на независниот и алтернативен театар. Публиката ќе има можност да ги проследи и претставите: „Да ми го поздравиш и бакнеш“ во режија на Билјана Радиноска на независниот театар „Артопиа“, „Скршена стомна“ на Софија Ристевска и „Интимен театар“ од Битола и комедијата „Прво ќе ме земеш, после ќе ме…“ на Ѓорѓи Ризески, во изведба на независниот театар „Крик“ – вели Игор Ивковиќ, селектор на фестивалот.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
