Турскиот претседател Реџеп Таип Ердоган денеска побара меѓународните организации „да го кренат гласот“ против Холандија и да и воведат санкции. Во обраќање на митинг во пресрет на референдумот за уставните промени во градот Коџаели, Ердоган изјави дека Холандија се однесува како „банана република“ и ги критикуваше европските земји затоа што не го осудиле „однесувањето на Хаг“.
Односите меѓу Холандија и Турција се влошија откако вчера холандските власти одбија да му дозволат слетување во земјата на авионот на шефот на турската дипломатија Мевљут Чавушоглу, кој требаше да говори на митинг во Ротердам, а подоцна од Холандија беше протерана и турската министерка за семејни прашања Фатма Бетул Сајан Каја.
Ердоган во обраќањето на митингот изјави дека Турција ќе ја натера Холандија да плати за својот однос кон турските министри, додавајќи дека без тоа нема да има помирување со Хаг.
Во меѓувреме се огласи и турската опозиција која им изрази поддршка на властите во спорот со Холандија. Лидерот на најголемата опозициска силa, Републиканската народна партија, Кемал Калачдароглу побара Турција да ги прекине дипломатските односи со Холандија, додека Партијата на националистичка акација повика на „замрзнување на односите со Хаг“.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
