На Македонија и треба политичка стабилност за да се продолжи со реформите. Ги повикувам главните политички актери во Македонија да се надминат разликите што ги разделуваат за доброто на сите граѓани на Македонија и заеднички да се најде решение за кризата. Сепак, морам да го потенцирам несоодветното мешање на други земји во внатрешните работи на Македонија. Македонија е независна и суверена држава и нејзиниот устав и интегритет треба да се почитува – изјави европратеничката од Хрватска и прв човек на „Групата на пријатели на Македонија во Европскиот парламент“, Маријана Петир.
Таа испрати соопштение во кое ја потенцираше поддршката за нашата држава, порачувајќи дека Република Македонија е независна и суверена држава и оти нејзиниот уставен интегритет треба да се почитува.
Според Петир, политичката криза во Македонија трае предолго и стана сериозна пречка за напредокот на земјата, функционирањето на институциите и секојдневниот живот на граѓаните.
Коментирајќи во врска со усвоената Резолуција на Европарламентот за Македонија, хрватската европратеничка рече дека е задоволна затоа што Европскиот парламент повторно го повика Европскиот совет да се разгледа прашањето за почеток на пристапните преговори со Република Македонија што е можно поскоро, и за она што го застапува особено имајќи предвид дека Македонија сосема неоправдано е под опсада повеќе децении.
Петир го пофали напредокот во билатералните односи меѓу Македонија и Грција и се истакнува дека билатералните прашања не треба да биде пречка за почетокот на пристапните преговори и дека отворање на преговорите може да го понуди посилна рамка за решавање на постојните билатерални проблеми.
– Понатамошното одложување на отворањето на преговорите може да го загрози кредибилитетот на политиката на проширување на Европската унија и претставува сериозен ризик за стабилноста во регионот. А, јас ја поздравувам и конструктивната улога што ја одигра Република Македонија во справувањето со предизвиците на мигрантската криза, за која Македонија се покажа како вистински чувар на надворешните граници на Европската унија, вели Петир.
На крајот во своето соопштение, претседателката на „Групата на пријатели на Македонија во Европскиот парламент“, нагласи дека Македонија е дел од европското семејство и изрази надеж дека Советот ќе ги слушаат препораките и повиците на Европарламентот и Комисијата за отворање на првите поглавја во процесот на пристапување на Македонија во ЕУ.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
