Прв национален и меѓународен натпревар во уметничко лизгање во Македонија

На ВИП Лизгалиштето во СЦ „Борис Трајковски“ во Скопје денеска продолжува Првиот национален и меѓународен натпревар во уметничко лизгање во Македонија “Skopje on ICE 2017”.

Денеска се одржуваат натпреварите во категориите Кадети Б, Младинки, Јуниори и Сениори и Кадети Ц, а вчера се одржаа натпреварите во категориите Младинци, Интерпретации Б, и Интерпретации Ц и А.

Натпреварот има национален, но и меѓународен карактер и на него учествуваат спортисти во повеќе категории, односно во меѓународно признаените категории: Младинци/ки, Јуниорки, Сениорки, како и во категориите за помлади натпреварувачи Кадети Ц и Б, и во интерпретативни категории согласно возраста на натпреварувачите.

На натпреварот, покрај домашните, учествуваат натпреварувачи и од Република Србија, Република Словенија, Република Грција и Кралство Шведска.

Учествуваат над 60 натпреварувачи, од кои половината домашни, а останатите од странство. На натпреварот судат меѓународно признати судии од неколку држави од Европа.

Натпреварот го организира Федерацијата за лизгачки спортови на Македонија, во соработка со СЦ „Борис Трајковски“

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.