Советите на Червар ќе ги користам низ целата кариера

Тој e еден од бисерите на македонскиот ракомет, кој со само 20 години стана капитен на Металург, а уште овој месец ќе го замени клубот за германскиот шампион Рајн-Некар Левен. Филип Талески наскоро почнува ново поглавје од својата кариера во Германија каде што ќе му се придружи на уште еден македонски репрезентативец, Дејан Манасков. Младиот лев бек беше дел и од нашата ракометна репрезентација на Светското првенство во Франција, кое викендов завршува, а за „Република“ говореше за неговото прво искуство на големите интернационални турнири, како и за очекувањата од неговиот нов тим.

Минатиот викенд го завршивме нашиот настап на светското првенство во Франција каде што стигнавме до осминафиналето и се пласиравме на 15. место. Какви се импресиите од мундијалот, кој беше твое прво големо првенство, и колку можеме да бидеме задоволни од пласманот?

TAЛЕСКИ: Може да бидеме задоволни од пласманот поради тоа што во таа осминафинална фаза испаднаа големи репрезентации како Германија, која е актуелен европски шампион, но и Данска, а видовме и дека Унгарија, која ја победи Данска, загуби од Норвежаните, кои нѐ елиминираа нас. Тие имаат еден многу добар систем каде што претежно целата екипа е млада и максимално влегува во секој натпревар, а и лани направи изненадување и ја победи Франција, така што може да бидеме задоволни со пласманот.

За мене ова беше прво искуство на овие големи натпреварувања и ќе ми биде поука дека во наредните натпреварувања ќе треба уште повеќе да се борам во секој натпревар и максимално да ја користам секоја дадена шанса.

Според тебе, кои се позитивните сегменти во играта што ги покажавме на ова првенство, а на што ќе треба да се работи повеќе и да се подобри во иднина?

TAЛЕСКИ: Ова е прво поголемо натпреварување и во него Македонија отиде со еден променет состав, една комбинација на искуство и на млади играчи од што излезе еден добар спој, но сѐ уште треба да се работи многу поради тоа што селекторот Червар воведува нов систем на игра, кој бара многу трчање и агресивност во одбраната и треба поголема физичка подготовка. Ние младите играчи во иднина ќе треба да добиваме малку повеќе слобода за да може послободно да играме и да дадеме сѐ од себе.

Селекторот Червар, со кој работеше во Металург, за првпат ја водеше нашата репрезентација на еден голем турнир. Колку ти помогна за да стигнеш таму каде што си сега?

TAЛЕСКИ: Тој е еден од најдобрите тренери, кој има освоено речиси сѐ во кариерата, само му недостига медал од европско првенство и мислам дека може многу да се научи од него, а сето тоа тој знае да го пренесе. Во овие четири години додека работам со него имам научено многу, но морам да нагласам и дека бара премногу од играчите, но тоа е позитивно затоа што така секој играч го дава максимумот на секој натпревар и на секој тренинг. Неговите зборови и совети што ми ги има кажано и што ми ги повторува ќе ми бидат патоказ низ кариерата и ќе ми користат и понатаму.

Чекор по чекор се одвива и смената на генерации на репрезентацијата, а и на овој мундијал повеќе млади играчи добија шанса за настап. Колку овие големи натпреварувања можат да му помогнат на еден млад играч да се развие, да здобие искуство и да додаде нешто во својата игра?

TAЛЕСКИ: Овој период за време на подготовките многу работевме со поискусните играчи, особено со Кире Лазаров, кој многу нѐ советуваше, ни покажуваше кои се маните и тоа што ни го зборуваше мора да го имаме предвид затоа што тој е еден од најдобрите светски бекови и со години е прогласуван за најдобар десен бек. Има многу работи да се научат од него, особено во нападот, и секој совет што ми го дава е добредојден за мене.

По мундијалот во Франција, летово те очекува уште едно Светско првенство, овој пат со младинската репрезентација во Алжир. Иако има време до јули, кои се очекувањата и желбите од тој турнир?

TAЛЕСКИ: Овие квалификации што ги одигравме тука мислевме дека ќе завршат многу полесно, но не беше така и моравме да се бориме до последна минута. Целта ја оствариме и се квалификувавме на Светското првенство во Алжир, последно за оваа генерација, за мене, за Неловски, Кузмановски и се надевам дека максимално ќе се подготвиме и ќе имаме квалитетни подготовки пред тоа првенство на кое мислам дека треба да го кажеме последниот збор со едно добро големо натпреварување и да забележиме повисок пласман.

Досега оваа генерација има играно на две ЕП и на двете бевме претпоследни, така што верувам дека може многу да направиме во Алжир поради тоа што има потенцијал и знаеме да играме ракомет.

Најверојатно уште следната недела заминуваш за Германија каде што почнуваш ново поглавје во кариерата со Рајн-Некар Левен. Колкава е возбудата пред да се приклучиш на олку голем клуб и кои се твоите очекувања?

TAЛЕСКИ: Веќе е во процедура мојата работна виза и штом ќе ја добијам, веднаш заминува за Германија каде што ме очекуваат и се надевам дека веќе в понеделник ќе тргнам. Ова е мое прво искуство во странство, клубот има големи амбиции, сака да освои прво место во Лига на шампиони, но и да го задржи првото место во домашното првенство. Клубот има и големи планови со мене, но планира и целосно да се подмлади.

Се надевам дека ќе се пронајдам таму и дека новата страница што ќе ја отворам во мојот живот ќе биде успешна, пред сѐ со добри почетни игри во тој клуб. Се надевам дека лесно ќе се снајдам, а потоа и дека ќе бидам еден од тие играчи на кои ќе можат максимално да сметаат.

Моја цел е да играм што повеќе, свесен сум дека нема да добивам голема минутажа на почетокот, но ќе ја чекам својата шанса и максимално ќе ја искористам за по секој натпревар да добивам сѐ повеќе минути.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.