Министерката за култура, Елизабета Канческа-Милевска, денеска престојува во работна посета на Република Турција, каде што ќе ѝ биде врачена меѓународната награда „Yes to Art“ во рамки на „Anatolian Theatrical Awards“, која ѝ се доделува за остварувања во уметноста и културата врз основа на досегашните активности реализирани во нашата земја.
Како што соопшти Министерството за култура, оваа награда, која е единствена на меѓународно ниво, трета година по ред во Истанбул ја доделува реномираното списание за театар „Tiyatro Gazetesi“. На доделувањето се поканети повеќе од 50 врвни уметници, раководители на ансамбли на кои ќе им бидат доделени наградите, меѓу кои е и Националната установа Турски театар Скопје.
Ова е второ признание за министерката за култура Канческа-Милевска во Република Турција која во 2011 година беше одликувана и со наградата „Златен чинар“ за посебни постигнувања во културата и уметноста, ифнормира Министерството.
Во рамки на посетата, Канческа-Милевска во текот на денешниот ден ќе оствари билатерална средба со својот турски колега, министерот за култура и туризам Наби Авчи, со кого ќе разговара за актуелни проекти, но и за идните активности за продлабочување на културните врски меѓу Република Македонија и Република Турција.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
