Војдан Стојановски со 10 поени во големата победа на Бетис против Реал Мадрид

Во натпревар од 14. коло на шпанската кошаркарска Ендеса лига, кошаркарите на Реал Мадрид на гостински терен против тимот на Реал Бетис се поразени со 86-85. За кошаркарите на Реал Мадрид ова е прв пораз оваа сезона, а во победата на Бетис, нашиот Војдан Стојановски постигна 10 поени, имаше три скока и две изгубени топки.

Тимот на Војдан Стојановски му парираше на „кралскиот клуб“, иако на средината на првиот дел гостите од Мадрид стигнаа и до +10 (29-39), но домаќините до одморот се вратија на негатива од -5 (41-46).

По паузата избраниците на Пабло Ласо одиграа уште една четвртина, која ја решија во своја полза и пред последните 10 минути влегоа со комотна предност од +9 (60-69).

Но, во последниот период кошаркарите на Бетис започнаа извонредно и по серијата 12-4 на пет минути до крајот, по тројката на Стојановски и поените на Махалбашиќ стигнаа на само -1 (72-73). На тоа Керол возврати со тројка за +4, до крајот се играше тесно и неизвесно, по поените на Трикуеро на 18 секунди пред крајот Бетис поведе со 86-85, што на крајот беше и конечен резултат.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.