Судот одлучи одлуката на Левица самостојно да настапува на изборите е легална

Основниот суд Скопје 2 го одбил барањето за забрана за спроведување на одлуката за самостоен настап на изборите како неосновано, соопшти Левица.

Партијата Левица денеска преку својот фејсбук профил соопшти дека Основниот суд Скопје 2 го одбил барањето за забрана за спроведување на одлуката на Левица за самостоен настап на изборите како неосновано. Ова, како што соопштуваат од партијата, е уште еден правен пораз да се оневозможи учеството на Левица на предвремените парламентарни избори.

„Основниот суд Скопје 2 го одби барањето на инфилтраторите за забрана за спроведување на легитимната одлука на Левица за самостоен настап на изборите, како неосновано! Ова е уште еден правен пораз на обидот на некои инсајдери и саботери да се оневозможи учеството на Левица на предвремените парламентарни избори. Согласно приложеното, јасно се гледа дека одлуката е статутарна и легална, уште повеќе донесена во демократска постапка, изгласана од мнозинството членови на Централниот комитет“, соопштуваат од партијата.
Левица порачува дека не потклекнува пред овие обиди за саботажи и замешателства, досега невидени во политичката историја на Македонија.
Левица со својата креативна кампања ќе успее да стане парламентарна партија и да се бори за интересите на најзагрозените категории во нашето општество.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.