Јолевски: По изборите Македонија ќе ги интензивира реформите за интеграција во ЕУ и во НАТО

Министерот за одбрана Зоран Јолевски вчера, во рамки на посетата на САД, оствари средби со претставници на фондацијата „Херитиџ“, Институтот Мекејн за лидерство и со Сали Пеинтер, член Бордот на Директори на Труман фондацијата за национална безбедност.

На средбите, како што информира Министерството за одбрана, бил ставен акцент на успехот на Македонија во соочувањето со емигрантската криза и начинот на соработка со земјите од регионот и било разговарано за заложбата на македонската Влада за организирање фер и демократски избори наредниот месец, со што, како што е наведено во соопштението, би се ставил крај на политичката криза што владее во земјата.

Министерот Јолевски дал уверување дека по изборите Македонија со забрзано темпо ќе ги интензивира реформите кои се пред се значајни за граѓаните на Македонија, а со тоа и ќе се овозможи полесна интеграција на Македонија во евроатлантскиот сојуз.

Во салата на реномираниот Институтот за мир на САД во Вашингтон, синоќа по седми пат се одржа традиционалниот Концерт за Денот на благодарноста со кој се одбележува стратегиското партнерство меѓу САД и Македонија. Македонските уметници, композиторот и пијанистот Дуке Бојаџиев и кларинетистот Исмаил Лумановски со речиси двочасовниот настап ја воодушевија публиката.

Министерот Јолевски во обраќањето пред присутните гости од Стејт департментот, Пентагон, од Сенатот и Конгресот, претставници од дипломатскиот кор, невладиниот сектор и македонската дијаспора во оваа прилика ја истакнал одличната соработка меѓу Македонија и САД и искажал благодарност за досегашната поддршка и стратешкото партнерство во областа на одбраната, образованието и науката, здравството, трговијата и инвестициите и други области.

Јолевски, како што соопшти Министерството за одбрана, денеска отпатувал за Канада каде ќе говори на Форум на тема „Мигрантската криза и нејзиниот импакт врз земјите од т.н. Западен Балкан, ЕУ и НАТО“, на Универзитетот Карлтон во Отава. Воедно во текот на денот ќе се сретне и со спикерот на канадскиот парламент, Џорџ Фуреј.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.